كوكب تاني
دلوقتي انا جييت للجزء الصعب و المحرج
اني انشر حاجة مكنتش عايزة حد يشوفها
حاجة ليها علاقة بحاجات جوايا مبيبقاش سهل اني اتكلم عنها
في معظم الاحيان بحاول ابين اني شخص صلب تماماً و اني عملية و مبتأثرش بأي نوع من المشاعر خاصة الرومانسي منها
نادراً اما بحب اتكلم عن الجزء ده او ابينه عشان ميبانش ضعفي الحقيقي
و عبطي و هبلي الصراحة
لان بالرغم من الوعي و الحكمة اللي بحاول كتير ادعيهم انا فالحاجات دي عبيطة جدا زيادة عن اللزوم
اللي هو شئ محرج الصراحة
فغالباً بدعي عدم وجود الجزء ده في حياتي او تفكيري عشان مضطرش احكي قصص عبيطة عنه تبين اد ايه ان انا برغم السن ده اعتبر طفله ساذجة اما الموضوع بيتعلق بالاعجاب او الحب او المشاعر اللي من النوع ده
المهم نتكلم عن السيناريو ده
ابتديت اثناء الورشة و بعدها تجيلي افكار لقصص و سيناريوهات ابقي اكتبها بعدين يمكن من قبلها كمان كانت بتجيلي افكار عبيطة
كتير مكنتش بفكر اكتبها بس يعني اما كتبت فالورشة و اتقالي ان كتاباتي قابله للقراءة ده شجعني للاسف اكتب 😃
بعد الورشة المدرب اخد كل واحد فينا يتكلم معاه لوحده شوية
اما قعد معايا قالي انتي و اسمين كمان من احسن الناس اللي كتبت فالورشة و اني المفروض اكمل كتابه و مبطلش (تقدروا تحاسبوه عالمأساة اللي انتوا بتقروها دلوقتي ) و اني المفروض ابتدي اكتب حاجة بتاعتي انا
يعني مش قصة هو ادهالي او حاجة ساعدني فيها وقد كان للاسف
الفكرة جاتلي اما ناسا اعلنت ان لقوا كوكب تاني مشابه للارض و يحتمل عليه بشر بس مش هيقدروا يعرفوا اي حاجة عنه عشان هو بعيد جدا و ما علينا من الكلام العلمي المفروض كنت اقرا اكتر فالموضوع
فانا اما شوفت الخبر ده كنت بقول لزميلتي في الشغل اللي كنا بنتندب علي حظنا ان مبنلقيش حد مناسب لينا
فقولتلها ان ممكن عشان مده ملقتش حد مناسب ليا عالارض لانه عايش عالكوكب التاني
اما دخلت الورشة ابتديت افكر اكتبها سيناريو و اما المدرب قالي اكتب قررت اكتبها
اخدت وقت طويل فالكتابة و كنت بكسل كتير او مبتجليش افكار
و في الاخر الحوار طلع مش راضية عنه بس الفكرة في المجمل كويسة
و ده كان رأي اتنين من اصدقائي كانوا معايا فالورشة و بعتلهم السيناريو
الحوار ضعيف بس الفكرة عامة حلوة
ممكن ابقي اعيد كتابتها او صياغتها بعدين في المستقبل
اسيبكوا مع السيناريو
الموجز:
تولي ناسا احدي عالمات الفضاء لديها مهمة اكتشاف طريقة للتواصل مع احد الكواكب المكتشفة حديثا المشابههة للارض ،اثناء بحثها تقع بحب احد سكان هذا الكوكب.
مشهد خارجي/نهار/منزل العالمة:
منزل معظمه مغطي بالزجاج والحيطان الموجودة لونها أبيض المنزل بطابق واحد فوقه العديد من اطباق الالتقاط و اعمدة لاسلكية ،موجود في وسط غابة معزولة .
تصل سيارتان امام المنزل ينزل بعض الاشخاص بينهم عالمة الفضاء ايرين وهي فتاة في اوائل الثلاثينات لديها شعر بني فاتح مموج مربوط باهمال و ترتدي نظارة قراءة وقميص كاروهات فاتح اللون وبنطال قماش و حقيبة ظهر .
تسير الي الامام يفتح باب المنزل رجل مرتدي بذلة طويل يسمي جاك.
جاك:اتفضلي يا دكتورة.
مشهد داخلي/نهار/داخل المنزل:
حيطان المنزل بيضاء يوجد الي اليمين مطبخ حديث الي جواره باب مؤدي الي حمام ،الي جواره خلف برافان ابيض سرير، خلف جزء منه مدخل لشرفة لها ستائربيضاء و يظهر بها تليسكوب ضخم، الي اليسارجهة الحائط توجد العديد من الشاشات ولوحات الازرار الحديثة امامها كرسي بعجل في الطرف الاخر من البيت طقم انتريه ابيض خلفه نافذة زجاجية كبيرة تصل لجزء من السقف.
تظهر الدكتورة وهي تدخل وتتفحص بعينيها المكان وهي مبتسمة ،يدخل خلفها بعض الاشخاص بعضهم يحملون بعض الاشياء و يقومون بتجهيزها في اماكنها و البعض الاخر يجهز اجهزة الكمبيوتر.
يقف رجل كبير في السن مرتدي نظارة طبية الي جوار ايرين وهو بروفيسور ريتشارد ومن الجهة الاخري جاك.
جاك:ها يا دكتورة كله تمام
ايرين:تمام
جاك: لو حاسة ان في حاجة ناقصة قولي.
تومئ ايرين براسها
يشير ريتشارد اليهما فيتجهوا جميعا للجلوس عند الانتريه.
جاك:كل اللي انتي محتاجاه موجود عايزين ناتايج سريعة بقي.
ريتشارد:اهدي يا جاك يعني دي حاجة كنتوا متوقعين ان تاخد 40 سنة عبال ما تتم .
جاك:ايوة بس انتو قلتوا هتقدروا تكتشفوا طريقة اسرع.
ريتشارد:تمام اسرع يعني 10 سنين
جاك :لا 10 سنين كتير
ايرين:متقلقش انا هقدر اكتشف طريقة في وقت اقرب بكتير من 10 سنين.
ريتشارد:متضغطيش علي نفسك يا ايرين
كفاية ان هتضطري تقعدي هنا لوحدك.
ايرين:انا اللي طلبت ده كده عشان أقدر اوصل لنتايج اسرع.
ريتشارد:لا خالي كل حاجة تاخد وقتها وزي ما بقولك دايما متخليش حبك للنجوم ياخدك مالحياة عالارض.
صوت جرس هاتف ريتشارد.
ريتشارد:البيت عارفين اني لازم ارد.
يسير في اتجاه الباب و يخرج.
جاك:وقت اقرب يعني اد ايه؟انا عامل حسابي علي 5 سنين والا صعب نكمل التمويل.
ايرين:متقلقش قلتلك مش هيزيد عن 5 سنين
هو دكتور ريتشارد بس اللي بيحب ياخد الامور بهدوء
بس انا مش زيه.
يضحكان.
مشهد داخلي/نهار/منزل ايرين/النافذة:
يتغير النهار الي ليل و تظهر الكثير من النجوم.
مشهد داخلي/ليل/منزل ايرين:
تقف ايرين عند الباب و تلوح مودعة حتي يذهب الجميع.
تغلق الباب و تقف امام النافذة تنظر الي النجوم وعلي وجهها ابتسامة واسعة.
ثم تتوجه ناحية اجهزة الكمبيوتر و تبدا بالعمل.
بعد فترة تتوجه ايرين الي السرير و تنام و تنظر الي الاعلي .
-لقطة استرجاعية-
-فلاش باك –
مشهد داخلي/نهار/قاعة محاضرات:
تظهر ايلين شكلها اصغر فالسن شعرها اطول،تجلس الي جوار شاب يدعي تيد وينظران الي بعضهما كل فترة ويبتسمان.
مشهد داخلي/ليل/منزل ايرين:
تتحرك ايرين لتنام علي جانبها و تنظر الي الحائط.
-لقطة استرجاعية-
-فلاش باك –
مشهد خارجي /نهار/حديقة جامعة:
تجلس ايرين وتيد و معهم بعض الكتب و تبدو انها تشرح له.
مشهد داخلي/ليل/منزل ايرين:
ايرين تتحرك من علي السرير و تتوجه الي البلكونة تنظر الي النجوم و تنظر من خلال التليسكوب.
صوت بداخل راس ايرين ريتشارد:زي ما بقولك دايما متخليش حبك للنجوم ياخدك مالحياة عالارض.
ترفع ايرين راسها وتضحك.
صوت براس ايرين:عشان ايه اسيب النجوم و افضل مع البشر
تجلس ايرين علي كرسي بالبلكونة و تسند راسها الي الخلف.
-لقطة استرجاعية-
-فلاش باك –
مشهد داخلي/نهار/ممر بالجامعة خارج غرفة تسليم ابحاث:
يقف تيد وينظر الي ساعته تأتي ايرين ناحيته و هي تجري تعطيه مغلف بحث مكتوب عليه اسمه يدخل الغرفة و تدخل خلفه و بيدها مغلف بحث مكتوب عليه اسمها.
مشهد داخلي/ليل/منزل ايرين:
ايرين الجالسة علي الكرسي بالبلكونة تحرك راسها الي الامام وتطبق قبضتها وتغمض عينيها بغضب.
-لقطة استرجاعية-
-فلاش باك –
مشهد داخلي/نهار/ممر بالجامعة خارج غرفة تسليم ابحاث:
يتزاحم مجموعة من زملاء ايرين و تيد و هم معهم لينظرا الي ورقة معلقة علي الحائط يظهر اسم تيد و بجواره
فيرفع قبضته في سعادة ويبتعد قليلاً ،يظهر اسم ايرين و بجواره A
B يظهر عليها الاحباط ثم تنظر الي تيد وتراه يبتسم فتبتسم و يضع ذراعه علي كتفها و يسيران .
مشهد داخلي/ليل/منزل ايرين:
تضحك ايرين ضحكة سخرية وتقف و تمشي الي الداخل حتي الكنبة و تتكئ عليها.
-لقطة استرجاعية-
-فلاش باك –
مشهد خارجي /نهار/حديقة جامعة:
نفس الشجرة التي كانت تجلس عندها ايرين و تيد معلق عليها يافطة مكتوب عليها MARRY ME
يقف مجموعة من الزملاء يرتدون ملابس احتفالات التخرج يشاهدون ،يظهر تيد مرتديا رداء حفل التخرج راكع علي احدي قدميه و بيده خاتم وينظر الي الاعلي ،نري مجموعة الاشخاص التي تشاهد تقف بينهم ايرين مرتدية رداء حفل التخرج و تمتلئ عيناها بالدموع و نري تقف امام تيد فتاة اخري تضع يدها علي فمها في فرح يقف تيد و يحتضنها تبكي ايرين و تجري مبتعدة.
مشهد داخلي/نهار/منزل ايرين:
تجلس ايرين الي اجهزة الكمبيوتر ويظهر علي احدي الشاشات جاك والاخري ريتشارد.
جاك:القمر الصناعي g12h جاهز انتي اللي تقدري تتحكمي فيه وتحددي وجهته علي حسب رؤيتك.
ايرين:تمام شكرا جدا مستر جاك اكيد هتشوفوا نتايج قريب.
جاك:لازم نشوف نتايج قريب انتي عارفة كل ده بيكلفنا قد ايه.
ريتشارد:معروف ان الابحاث دي بتكلف بس كل حاجة لازم تاخد وقتها عشان تدي نتيجة متضغطش عالدكتورة اكتر من كده.
جاك:عامة انا لازم انبه ...اسيبكوا تكملوا نقاشتكم العلمية.
ريتشارد:سيبك من الراجل ده يا ايرين انتي كده عامله اللي عليكي و زيادة
حاولي ترتاحي شوية و تتمشي بالعربية تروحي مكان فيه ناس شكلك هريا نفسك شغل و مبترتاحيش.
ايرين:لا عادي انا كويسة و كمان انا بحب الشغل انت عارف.
ريتشارد:اه عارف و خايف عليكي تفني نفسك في حاجات زي دي
زي ما بقولك دايما.
ايرين:متخليش حبك للنجوم ياخدك مالحياة عالارض.
وتضحك
ويضحك ريتشارد.
ريتشارد:اديكي شاطرة وحافظة اهه ،مش معني ان ستيفن خذلك ان كل الناس زيه.
صوت براس ايرين:هو ستيفن بس.
ايرين:طبعا يا بروفيسور بس في حاجات اهم من العلاقات.
ريتشارد:اما هتكبري مش هتقولي كده
ايرين:تمام يا دكتور معلش لازم اقفل دلوقتي نتكلم تاني الاسبوع الجاي.
تغلق المكالمة.
ترجع بالكرسي للخلف حتي يستند بالجهاز عند الحائط.
-لقطة استرجاعية-
-فلاش باك –
مشهد داخلي/ليل/مطعم:
تجلس ايرين مرتدية فستان احمر وتضع مكياج ويجلس امامها شاب مرتدي قميص وبنطلون و نظارة و له شارب.
ستيفن:عزماني ليه النهاردة بقي ايه المفاجأة اللي عندك؟
ايرين:مفاجأة تحفة احنا بنحتفل النهاردة عشان بروفيسور ريتشارد اختارني اقود الفريق اللي مسافر
القمر.
ستيفن:ايه ده انتي هتسافري وتسبيني؟
ايرين:انت عارف ان ده حلم حياتي.
ستيفن:هو عشان حلم حياتك هتسيبي حب حياتك.
ايرين:ليه هسيبك هما 6 شهور وارجع.
ستيفن:6 شهور ايه افرضي مدوا البعثة
وكمان انا ايه يقعدني طول المدة دي لوحدي
متزعليش بقي لو جيتي لقيتني ارتبطت بواحدة تانية.
يقف ويتركها غاضباً
مشهد داخلي/نهار/منزل ايرين:
مازالت ايرين تجلس علي نفس الكرسي
صوت براس ايرين:ليه بس تفكرني بستيفن يا دكتور ريتشارد انا ناقصة.
-لقطة استرجاعية-
-فلاش باك –
مشهد داخلي/نهار/مركز الأبحاث:
تجلس ايرين ممسكة بالهاتف يظهر اسم ستيفن لكنه لا يرد
يدخل بروفيسر ريتشارد.
ريتشارد:ايه ده ..انتي لسه هنا يا ايرين.
ايرين:هو في حاجة.
ريتشارد:الناس كلها فالمطعم عشان حفلة ستيفن والبعثة بتاعته.
ايرين:بعثة ايه؟
ريتشارد:انتي هنا في الابحاث دايما يا ايرين
ومبتعرفيش حاجة
اصلا ستيفن كان المرشح بعدك للبعثة و هو كان عارف ده حتي كان مدايق اما عرف ان الاولوية ليكي
بس طبعا اما رفضتي انتي تروحي من غير سبب دي كانت فرصته .
تنظر اليه ايرين في صدمة وتبدا الدموع بالتجمع في عينيها.
ريتشارد:ايه يا ايرين انا مكنتش اعرف انك من الناس دي
انتي اللي رفضتي زعلانة ولا غيرانة ليه دلوقتي.
تبدأ ايرين في البكاء الشديد وتضع وجهها داخل كفيها.
يقترب منها ريتشارد ليربت علي كتفها.
ترفع ايرين راسها و تمسح الدموع بيدها و تنظر اليه.
ايرين:عارف انا رفضت اروح ليه
مشهد داخلي/نهار/منزل ايرين:
تقف ايرين بغضب و تسيل من عيناها بعض الدموع
صوت براس ايرين:ليه كده يا دكتور ريتشارد .
مشهد داخلي/نهار/منزل ايرين/النافذة:
يتغير النهار الي ليل و تظهر الكثير من النجوم.
مشهد داخلي/ليل/منزل ايرين:
تجلس ايلين الي الكمبيوترات تعمل ،يبدو شعرها غير مرتب و تحت عينيها بعض السواد.
تنظر ايلين الي شاشة مجاورة يبدو عليها كوكب شبيه بكوكب الارض ،تقوم بالضغط علي بعض الازرار فتقترب الصورة و تظهر اضواء متفرقة علي صورة الكوكب فتنظر اليه و تندهش و تبتسم و يظهر عليها الارتياح .
ايرين:اخيرا مش مصدقة
تقف ايرين و تدور فرحة فالصالة.
ايرين:اخيرا وصلت لحاجة
تقف ايرين و ترقص و تدور حتي تجلس علي كرسي الانتريه و ترفع راسها و تنظر للنجوم و علي وجهها ابتسامة واسعة.
صوت بداخل راس ايرين:يا تري الكائنات اللي عليه شكلها ايه
ياتري عليه بني ادمين شبهنا
تغمض عيناها وتبتسم
صوت بداخل راس ايرين:يا تري هلاقي هناك حد ليا
تفتح عيناها و تضحك
صوت بداخل راس ايرين:ايه المشكلة مادام مفيش حد مناسب ليا هنا
ممكن الحد اللي مخلوق عشاني موجود هناك.
تغمض عيناها وتتنهد وتبتسم .
مشهد خارجي/ليل /الغابة خارج منزل ايرين:
تظهرالنجوم التي كانت تنظر اليها ايرين ثم الغابة يتغير الليل الي نهار ثم تظهر الشمس و يتغير الليل الي نهار مرة اخري نفس المنظر للنجوم ثم تظهر ايرين من الخارج وهي جالسة الي الاجهزة تعمل .
مشهد داخلي/ليل/منزل ايرين:
تضغط ايرين ازرار ثم تنظر الي الشاشات يظهر علي نفس الشاشة الكوكب و ظاهرة اضواءه ثم تقترب صورته تتحمس ايرين و تبدا بالعمل اسرع و تتحرك بالكرسي بين الاجهزة جميعا تضغط بعض الازرار علي كل منهم، تقترب صورة الكوكب يظهر بعض المنازل و شاطئ بحر، ايرين تعمل، يظهر شخص يقف و ينظر الي السماء.
-في نفس الاثناء-
مشهد خارجي/ليل/شاطئ البحر:
يسير شاب خارج منزله الشاطئي ويقف علي شاطئ البحر و ينظر لنجمة تضئ و تطفئ و تتحرك .
صوت داخل راس ايان:ظهر نجمي ،اتمني مفضلش لوحدي .
-في نفس الاثناء-
مشهد داخلي/ليل/منزل ايرين:
صوت داخل راس ايرين:ايه ده ،ده انسان شبهنا
هو بيبصلي كده ليه
هما خارقين ،يكون شايفني.
تضحك
ايه اللي بتقوليه ده يا ايرين
اكيد مش شايفني
يعني انا شايفة حد من كوكب تاني ليه اكيد مش شايفني
ليه مايكونش شايفني او عالاقل يكون حاسس بوجودي
هو انا ليه حاسه زي ما يكون اجمل شخص شفته في حياتي
هو الكوكب ده كل كده ولا عشان بقالي كتير ماشوفتش ناس اصلاً.
تضحك و تتوجه الي السرير و ترتمي عليه و تنام.
مشهد خارجي /ليل/شاطئ البحر:
ايان مستمر في النظر للنجم.
صوت براس ايان:النجم بطل يتحرك
ممكن يكون سفينة فضاء عليها كائنات فضائية هتخطفني لكوكب تاني.
يضحك ايان و يتجه لمنزله.
مشهد داخلي/ليل/منزل ايرين/الشرفة جوار سريرها:
يتغيراليل الي النهارثم النهار الي ليل و تظهر الكثير من النجوم.
مشهد داخلي/ليل/منزل ايرين:
تجلس ايرين تتأمل شاشة الكمبيوتر يظهر عليها ايان جالسا علي كرسي موجود بشرفة منزله بجوارها سلم يوصله للشاطئ وامامه طاولة عليها كمبيوتر شخصي(لاب توب).
ايرين:دول مش مختلفين عننا ابدا
صوت داخل راس ايرين:ازاي ممكن اكلمه.
-في نفس الاثناء-
مشهد خارجي /ليل/شرفة المنزل الشاطئي:
يجلس ايان يقوم بارسال ايميلات تخص العمل من اللاب توب الخاص به ثم ينظر للنجم يضئ ويطفئ ويتحرك اكثر من كل مرة .
يقف ايان و ينظر فيتحرك النجم و يضئ فيعود مرة اخري ويجلس و هو معطي ظهره للنجم و يدير اللاب توب جهته.
مشهد داخلي/ليل/منزل ايرين:
تضغط ايرين علي الازرار فتقترب الصورة ،علي لاب توب ايان حتي تري بريده الالكتروني.
تبتسم وهي تكتبه بشاشاة اخري وتبدا بارسال ايميل.
صوت برأس ايرين: انا ايرين عالمة فضاء انت بتبص فوق ليه
انت شايفني؟
-في نفس الاثناء-
مشهد خارجي /ليل/شرفة المنزل الشاطئي:
يصل ايميل لايان فيفتحه و يقرا رسالة ايرين، يبدو عليه الذهول ينظر للنجم فيجده متوقف و بعدها يبدا بالاضائة فيجلس بحيث يكون النجم امامه مرة اخري .
وينظراليه فيجده يتحرك ويبدا بالكتابة .
صوت برأس ايان :دي اشتغالة.
يقوم ايان بتشغيل محادثة صوتية.
ايان:الو
صوت عبر اللاب توب ايرين:ايوه كويس ان نقدر نتكلم كده احسن
ايان:مين معايا
صوت عبر اللاب توب ايرين:انا عارفة اني اللي هقوله غريب حقك تستغرب فعلاً
بس دي الحقيقة انا ايرين عالمة فضاء و ابحاثي وصلتني ليك.
ايان:يعني انتي علي سفينة الفضاء اللي ظهرالي دي
صوت عبر اللاب توب ايرين:في سفينة فضاء ظهرالك
ايان:قصدي النجم اللي بيتحرك
صوت عبر اللاب توب ايرين:اه انت شايف نجم هو ده اللي بتبصله
ده اكيد القمر الصناعي
ايان:ايوه انتي عالقمر ده يعني
صوت عبر اللاب توب ايرين:تضحك
لا ده اللي بيوصل الارسال بينا انا في كوكب ابعد بكتير
بس غريبة بتتكلم حتي نفس اللغة
ايان:انا اللي مستغرب كل حاجة ومش مجمع الصراحة
صوت عبر اللاب توب ايرين:عادي متقلقش
ايان:يضحك مش قلقان بس حاسس انها اشتغالة
صوت عبر اللاب توب ايرين:لا مش اشتغالة هو علم الفضاء بيبقي صعب يتصدق زي الاحلام
ايان:خلي النجم يتحرك تاني كده
صوت عبر اللاب توب ايرين:قصدك القمر الصناعي
تضحك
تمام
ينظر ايان للنجم فيجده يتحرك يبتسم ابتسامة واسعة
ايان:معلش بس لازم اتاكد يعني
صوت عبر اللاب توب ايرين:لا ولا يهمك
دلوقتي ممكن تساعدني و توصلني بايميل مركز ابحاث فضاء في كوكبك
ايان:انتي بتطلبي مصلحة كده علي طول
صوت عبر اللاب توب ايرين:اسفة بس مش عايزة اضيع وقتك
ايان:لا مش هيضيع ولا حاجة
انا عايز اعرف انتو كائنات شبهنا ولا عاملين ازاي
صوت عبر اللاب توب ايرين:علي حسب اللي انا شايفاه اه احنا شبهك الا لو انت حد غريب في كوكبك
تضحك
ايان:انتي فعلا شيفاني
صوت عبر اللاب توب ايرين:ايوه شيفاك من خلال شاشة كمبيوتر عن طريق القمر الصناعي بيوصل احداث
ايان:خلاص من غير تفاصيل علمية
انا بس مش مصدق اني بكلم حد ابعد مالنجم
ينظر ايان للنجم
ايان:ده ولا الاحلام فعلا
-في نفس الاثناء-
مشهد داخلي/ليل/منزل ايرين:
تجلس ايرين تتأمل شاشة الكمبيوتر يظهر عليها ايان جالسا علي كرسي موجود بشرفة منزله بجوارها سلم يوصله للشاطئ وامامه طاولة عليها كمبيوتر شخصي(لاب توب).
ايرين:تمام تقدر توصلني بمركز
صوت عبر جهاز الكمبيوتر ايان:انتي برده مستعجله تخلصي كلام معايا
ايرين:لا انا بس مطالبة بنتايج في وقت محدد
صوت عبر جهاز الكمبيوتر ايان:عادي مش هيجري حاجة انا اقدر احكيلك عن حياتنا ودي معلومات مهمة برده
تبتسم ايرين
ايرين:مفيش مشكلة و بعدها توصلني بمركز الابحاث
صوت عبر جهاز الكمبيوتر ايان:حاضر يا ستي هعمل اللي انتي عايزاه
مشهد خارجي/ليل/شاطئ البحر:
يجلس ايان اما جهاز اللاب توب ، يتغير الليل الي نهار و يختفي ايان ثم يتغير النهار الي ليل و يظهر جالس و متكئ و يسير ويجلس و يتحدث وينظر للنجوم تختفي النجوم وتظهر الشمس اكثر من مرة.
-في نفس الاثناء-
مشهد داخلي/ليل/منزل ايرين:
تجلس ايرين الي اجهزة الكمبيوتر يتغير الليل الي نهارتظهر الشمس بدل النجوم ايرين نائمة علي السرير ممسكة بخصلة من شعرها يتغير النهار الي ليل ايرين تسير امام اجهزة الكمبيوتر تتحدث و تضحك تجلس تتكئ شعرها مربوط و بعدها طليق تجلس علي كرسي الانتريه تتكئ تنظر للنجوم تختفي النجوم و تظهر الشمس اكثر من مرة .
مشهد داخلي/نهار/منزل ايرين:
تجلس ايرين الي اجهزة الكمبيوتر مفرودة الظهر شعرها مرتب و مربوط يظهر علي شاشة امامها ريتشارد والاخري جاك.
جاك:مش معقول التأخير فالنتايج ده يا دكتورة.
ايرين:حضرتك اكيد عارف ان الحاجات دي بتاخد وقت.
جاك:بتاخد وقت بس نعرف اي حاجة الدنيا بقت فين
دي حاجات مكلفة ملايين انتي ازاي مستهترة بيها كده.
ريتشارد:براحة يا جاك معروف فعلا ان الابحاث اللي زي دي بتاخد وقت
ايه المشكلة
جاك:ايه المشكلة .. مش عارفيين ايه المشكلة
المشكلة ان في ملايين بتدفع و بتروح عالارض
من غير نتايج
اخر كلام عندي لازم بعد كده يوصلني تقرير يومي بابحاثك
ايرين:يومي
يغلق جاك المكالمة.
ريتشارد:معلش يا ايرين انا هكلمه انه يكون تقرير اسبوعي
وهظبطه معاكي متقلقيش
بس برده مش المفروض تقطعي معانا كده كام شهر ولا تقرير ولا مكالمة
لولا رسالة انا بخير اللي بتردي بيها عليا كنت قلت حصلك حاجة.
ايرين:اسفة يا بروفيسور انت عارف انا ازاي بندمج في الشغل.
ريتشارد:عارف و مقدر بتضحي بايه مقابل حبك لشغلك
بس لازم تتواصلي معانا اكتر من كده
ايرين:حاضر متقلقش عليا عامةً
ريتشارد:اتفقنا ،سلام دلوقتي
ايرين:سلام
ترجع ايرين بالكرسي للخلف
صوت برأس ايرين:وبعدين يا ايرين هتسيبي واحد يبعدك عن شغلك و يدمر احلامك كده
تقف ايرين وتتجه الي كرسي الانتريه وتتكئ عليه رافعة ساقيها الي جوارها واضعة يدها علي احدي ساقيها
ساندة ذراعها علي المسند الخلفي للكرسي ممسكة احدي خصل شعرها وتحركها باصبعها و تنظر للغابة و السماء.
صوت بداخل رأس ايرين:هو انا بجد بحبه
ولا عشان هو من كوكب تاني
ولا عشان انا لوحدي ومحتاجة حد اتكلم معاه
ممكن اكون معجبة بفكرة انه بعيد ومن مكان غريب
طب ليه ما حاولتش اجرب اكلم حد تاني من نفس الكوكب ليه هو
انا هاخر ابحاثي واضيع اسمي عشان بحب كائن فضائي
لا ايان عنده حق انا كده بعرف عن الكوكب التاني بعرف ان هما زينا بالظبط بس الطف
و اوفي واجمل
تسند راسها الي المسند و تغلق عيناها للحظات ثم تفتحهم مرة اخري
صوت بداخل راس ايرين:دكتور ريتشارد كان عنده حق اديني مقدرتش افضل لوحدي
واتشعبطت في حب بعيد
انا فعلا محتاجة حد محتاجة احب حد حتي لو مش هقدر ارتبط بيه
طب انا بحبه عشان بحبه و لا بحبه عشان محتاجه احب
انا ليه محتاجة احب
تقف ايرين و تتجه الي النافذة و تغمض عيناها ثم تبتسم وتفتح عيناها وترفع راسها الي اعلي
صوت بداخل راس ايرين: انا محتاجة احب عشان ببقي حد احسن وانا بحب
ببقي مبسوطة وعندي امل فالحياة
حبي ليه حاجة حلوة حتي لو نهايتها مكنتش كده.. كفاية ان النجوم اللي عرفتنا
-مشهد تخيلي-
مشهد خارجي/ليل/الغابة خارج منزل ايرين:
تقف ايرين مرتدية فستان اسود كاشف للظهر شعرها مرفوع واضعه يدها علي كتف ايان المرتدي بذلة سوداء وممسكة بيده باليد الاخري ،يضع ايان يده الاخري فوق خصرها و يرقصان في منتصف اشجار موجودة بشكل دائري و تظهر النجوم تضئ المكان هي و بعض الاضاءات علي الاشجاروالارض متناثرة كالنجوم .
مشهد داخلي/ليل/منزل ايرين:
تبتعد ايرين عن النافذة وهي مبتسمة و تتجه في اتجاه اجهزة الكمبيوترفي طريقها تفكر
صوت بداخل راس ايرين:مش مشكلة انه بعيد
عشان ابقي متوقعة الفراق ومتجرحش قوي اما يسيبني
وعالاقل اما ارجع وسط الناس حبه هيحميني من اني احب حد زي تيد او ستيفن.
تجلس ايرين الي الكمبيوتروتربط شعرها و تبدا العمل
مشهد خارجي/ليل/شاطئ البحر:
ينظر ايان للنجوم ثم يسير بمحاذاة البحر و يترك مياه البحر تلمس قدميه ثم يذهب ليجلس الي اللاب توب.
-مشهد تخيلي-
مشهد خارجي /نهار/شاطئ البحر:
ايرين مرتدية فستان ابيض بسيط كاشف للكتفين تسير جهة الشاطئ ممسكة بيد ايان المرتدي بنطال ابيض و قميص ابيض مبتسمان و يسيران.
مشهد داخلي /ليل/منزل ايرين:
ايرين جالسة الي الكمبيوتر تبتسم
ايرين:اخيراً فينك
بقالنا اكتر من اسبوعين مبنتكلمش
حصل حاجة.
صوت من داخل الكمبيوتر ايان:وصلتي لايه في ابحاثك
هتقدري توصلي لهنا أبداً.
ايرين:زي ما قلتلك الموضوع مش سهل و بتواصل مع ناس بيعملوا ابحاث في اتجاهات تانيه
دي مش بايدي لوحدي
صوت من داخل الكمبيوتر ايان:وبعدين
حتي لو وصلتوا لطريقة زي ما قلتي قبل كده هتاخدي سنين عقبال ما توصلي لهنا
انا قلتلك ان احنا صعب نستمر كده
ايرين:اعمل ايه انا حاولت علي قد ما اقدر
اكيد انا كمان عايزة ابقي معاك بس
صوت من داخل الكمبيوتر ايان:خلاص ولا بس ولا حاجة
انا بعتلك حالا الايميل اللي كنتي بتكلميني عشانه مالاول شوفي هيفيدك بايه
مينفعش نتكلم تاني
سلام
ايرين:استني بس
يغلق المكالمة و يظهر بالشاشة انه اغلق اللاب توب ويقف و يتجه الي داخل المنزل و يغلق الانوار
مشهد داخلي/نهار/منزل ايرين:
ايرين جالسة الي الكمبيوتر لتراقب ايان و يتغير الليل الي نهار وهي تنظر الي الشاشة.
ايرين نائمة علي السرير تتحرك ثم تضع المخدة علي راسها ثم تزيل المخدة ثم تنظر الي السقف و تدمع عيناها.
يتغير النهار الي ليل والي نهار و ايلين مازالت علي السرير.
مشهد خارجي/ليل/الغابة خارج منزل ايرين:
تظهر النجوم والغابة ويتغير الليل والنهار بسرعة اكثر من مرة.
مشهد داخلي/نهار/منزل ايرين:
تنظر ايرين لشاشة الكمبيوتر فتجد ايان يرتدي بنطال ابيض و قميص ابيض في الخارج يقف علي الشرفة ،تبتسم ايرين، تخرج من المنزل فتاة مرتدية فستان مثل الذي بالمشهد التخيلي تمسك يده فيلمع شئ بيدها تقرب ايرين الصورة تجده خاتم تدمع عين ايرين،يرفع ايان يدها و يقبلها و يسيران معا بمحاذاة الشاطئ
تقف ايرين غاضبة و تكسر الشاشة.
مشهد داخلي/نهار/منزل ايرين:
يقف جاك و ريتشارد عند اجهزة الكمبيوتر معهم ايرين و يقف بعض الاشخاص فالخلف.
جاك:حلو قوي انك قدرتي تصوري الكوكب صور بالقرب ده
ريتشارد:ده شئ عظيم فعلا في وقت بسيط بجد برافو يا ايرين
دي حاجة كانت هتاخد سنين عشان حد يوصلها
يربت علي كتفها و يبتسم لها في سعادة.
تذهب ايرين الي سريرها و تحمل حقيبة ظهرها ثم تتجه ناحيتهم.
ايرين:اسيبكم بقي مع السلامة.
جاك:ايه ده استني لسه هتعمليلنا الاتصالات مع الكوكب التاني
ايرين:لا مش هقدر انا هروح اتواصل مع الناس عالارض احسن.
ريتشارد:عندك حق يا ايرين انتي كده عملتي اللي عليكي و زيادة احنا هنكمل بقي
مع السلامة
تنظر اليه ايرين مبتسمة و تحتضنه مودعة و تسير مبتعدة.
أو مشهد بديل:
مشهد داخلي/نهار/منزل ايرين:
يدخل جاك و ريتشارد وبعض الاشخاص من الباب و يتجهان ناحية ايرين .
جاك:اسفين جدا يا دكتورة طلع ان القمر الصناعي بينقلك بالخطأ احداثيات و صور الارض
احنا اسفين جداً هنعدله دلوقتي و تكملي شغلك عادي
يجلس بعض الاشخاص الي الاجهزة ويبدؤ بالعمل
يقترب ريتشارد من ايرين الواقفة في ذهول و يضع يده علي كتفها
ريتشارد:معلش يا ايرين اكيد الابحاث اللي عملتيها هتبقي مفيدة في حاجة.
يستمر بالكلام (ايرين شاردة)
صوت بداخل راس ايرين:ايه ده يعني ايان عالارض و ممكن في مدينة قريبة
بس انا معرفتش غير اما اتجوز واحدة تانية
تضحك في سخرية
وتتجه الي سريرها و ترتدي حقيبة الظهر و تتجه الي الباب.
جاك:رايحة فين هيظبطوا الدنيا و تكملي شغلك اهه
ريتشارد:سيبها هي اكيد محتاجة اجازة.
ايرين:لا انا همشي علي طول كملوا انتوا
انا محتاجة اعيش
يبتسم ريتشارد و يرفع يده يحيها تبتسم له وترفع يدها تحيه و ترحل.
مشهد خارجي/نهار/الغابة خارج منزل ايرين:
تسير ايرين ثم تبدئ فالجري وتنظر الي السماء و تبتسم
صوت برأس ايرين:يعني الارض عليها ناس تستحق تتحب بس انا اللي كنت حابسة نفسي عند النجوم
تضحك و تجري مبتعدة.
النهاية
السيناريو محتاج يتظبط فيه حاجات كتير اظن مش عارفة امتي هظبطها
الافكار اللي كانت في دماغي اللي هي فكرة الناس اللي زينا علي كوكب تاني
فكرة اللخبطة اللي بتحصل في دماغ الواحد اما يحس بحاجة ناحية حد و ميعرفش هي ايه
فكرة احتياجنا رغم الانكار ان يبقي معانا حد او نحس بحاجة ناحية حد
فكرة ان ممكن حد يضيع عليه فرص كتير للحب او الحياة و هو حابس نفسه و بيفكر فالاذي اللي اتاذاه قبل كده او الاذي اللي ممكن يتإذيه
و ان لو الواحد خرج نفسه من الكوكب اللي عايش فيه و ابتدا يشوف اماكن مختلفة و يتعلم حاجات مختلفة و يقابل ناس مختلفة ممكن يلاقي فرص للسعادة
Comments
Post a Comment