الاكل في الهند 1
وأنا فالهند دوقت انواع اكل مختلفة عن اللي بناكلها في المطعم الهندي ممكن تلاقي نفس الانواع دي في المطاعم الهندية الفاخرة
بس مش في المطاعم الشعبية
و خلينا نتفق بردوا ان الهند واسعة و فيها اكتر من منطقة و عادات مختلفة
وعادات اكل مختلفة طبعاً
مثلاً في الشمال علي حسب ما سمعت النباتيين اكتر من المديتة اللي كنت فيها
المدينة اللي كنت فيها كان اسمها حيدراباد ودي فيها مسلمين كتير عشان كده كان في اكل مش نباتي اكتر من الشمال وحتي كمان كان ممكن تلاقي لحم بقري
اللي هو كان محظور دبحه لفترة طويلة لان البقر زي ما معروف لمعظم الناس مقدس في الهند او في الديانة الهندوسية بشكل خاص
هحكي عن شوية اكلات جربتها مثلاً البرياني دي اكله مشهورة ممكن تلاقيها في اي مطعم هندي
بس هناك كان ليها مطاعم مخصصة للبرياني منها سلسلة مطاعم برادايس للبرياني فقط
الوجبة دي عبارة عن رز و توابل و خضراوات او فراخ او لحمة اللي هي فالغالب لحمة معييز
بتبقي شوية زي الكبسة بس طبعاً حراقة اكتر بكتير
عشان يبردوا الشطة اللي فيها ساعات بيحطولها بيكون جنبها كده زبادي مخفف بالتوابل
كأنه مشروب زبادي بس أخف كانوا بيقولوا عليه
butter milk
ده لو الغداء معظم الوقت او العشاء و وجبة الغداء مهمة قوي بالنسبة للهنود
لازم ياخدوا راحة من الشغل علي الساعة واحدة كده عشان ياكلوا مفيش جو اتغدي اما اروح الساعة خمسة او الكلام ده
بالنسبة لوجبة الفطار فعندهم حاجة اسمها ايدلي ،انا محبتهاش قوي الصراحة هي عبارة عن رز و جوز هند منقوعين سوا و مطبوخين سوا و معمولين فطيرات شبه الكحك كده و كانوا بيقدموها مع صوص معمول من الجوز الهند طعمه يشبه البابا غنوج وكان عليه تمر هندي او صوص تاني افضل شوية و حراق معمول من الفول السوداني
نكمل مرة تانية لسه في اكل و مشروبات كتير محكتش عنها
Comments
Post a Comment