كازينو الجنة
زي ما حكيت كان المدرب في ورشة السيناريو ادي لكل واحد فينا قصة عبارة عن سطرين يكتب منها سيناريو فيلم قصير
القصة اللي المدرب ادهالي كانت عن كبارية و حاجات كده و املوضوع ده كان مدايقني شوية وقتها لان لقيت باقي قصص البنات رقيقة و حب و حاجات لطيفة(بس الصراحة هو الوش اللي انا كنت مدياه مش رقيق خالص 😁) ، وانا وقتها قلتله :انت مديني حاجة فيها قتل واني مش عايزة حاجة فيها قتل، قالي: تحبي اغيرهالك؟
فكرت انه لو غيرها و كتبتها وحش هيقولي يعني غيرتهالك و بردوا كتبتيها وحش فقلتله لا متغيرهاش بس انا اللي هتتقتل هتبقي .واحدة شريرة
(وكنت عماله افكر يوم ما كتبت لاني مكنتش حساها حلوه( دايما بشوف اللي بكتبه او اللي بعمله مش حلو لحد ما حد يقولي انه حلو انه لو قالي انه وحش هقوله انت اللي ادتني قصه مش عجباني
واللي حصل ان كان اختياره ليا يعتبر مناسب لأن القصة دي محتاجة تفاصيل في مشهد النهاية و المدرب وجهني لده شوية و الحمدلله كتبتها كويس وده علي حسب رأي المدرب و بعض زمايلي
و هتشوفوا بعدين ان انا ممكن منفعش اكتب حاجات رقيقة و رومانسية اصلاُ 😆 واني تقريباً المفروض اكتب عن المعاناه وبس 😏
اما كتبت السيناريو كتبته الاول علي ورق وكان طويل شوية فاما نقلته للكمبيوتر حذفت خمس مشاهد وده كان للاحسن علي ما اظن
و المدرب اما قراه حذف مشهد و بدله بجملة هوضح عندها و وضحلنا ان نوع الفيلم ده نوير
بس كان رايه ان السيناريو رائع و مكتوب باحترافية و طبعة عشان يحتفظ بيه و دي حاجة فرحتني طبعاً
اسيبكوا مع السيناريو
********
رجب يقصد كازينو الجنة بعد عودته من الجيش لقتل اخته حُسنة بينما تحاول أمه أن تحذرها قبل وصوله، في الكازينو تلجأ حسنة دوما لحيلة مع شادية لتحل مكانها مع رشاد باشا، فينتهي برجب الأمر بقتل الفتاة الخطأ.
مشهد داخلي – نهار – منزل حسنة :
منزل متواضع للغاية مبني بالطوب الاحمر ،توجد طبلية وحصيرة بالمنتصف، في طرف الحجرة يوجد حوض بجوارة بوتجاز بدائي صغير و اسفلة بعض اواني الطهو مما يبدو كانه مطبخ داخل الصالة ، ويظهر باب أمام باب البيت مباشرةً يطل علي غرفة نوم في المنتصف، و في الجهة الاخري توجد كنبة خشبية مستطيلة امامها ترابيزة صغيرة مغطاة بمفرش بلاستيكي و فوقها تلفاز قديم بجواره هاتف.
تجلس ام حسنة علي الارض تسند يدها فوق الطبلية و تسند راسها الي يدها و يبدو عليها القلق الشديد و هي سيدة في اواخر الخمسينيات ترتدي جلباب اسود اللون و تربط راسها بأمطة .
حسنة فتاة جميلة في مقتبل العشرينيات لها شعر اسود طويل مربوط دائماً تتميز بوجود شامة فوق شفتيها .
تدخل حسنة من الباب يبدو عليها الحماس .
حسنة: التنسيق ظهر
تدفع كتف والدتها دفعة رقيقة وتكمل:في ايه بقولك التنسيق ظهر واتقبلت في الكلية اللي انا عايزاها .
مالك ايه اللي حصل رجب كويس.
والدة حسنة محركة يدها بالهواء مستنكرة: كلية ايه مش أخوكي قال لأ
وكمان المعلم متولي لسه ماشي بيقول أخوكي قبل ما يروح كان مديونله بفلوس و راهن البيت ويا نبتدي نسدد يا هنتطرد.
حسنة:ايه اللي يخلي رجب يبقي مديون لواحد زي ده .
والدتها: أنا أعرف،أما اترجيته قال هيقسط المبلغ
هيخلينا ندفعله 2000 جنيه كل شهر .
حسنة : هنجيب منين المبلغ ده كله
ورجب بقاله شهرين ولا خبر
كان عالاقل يقولنا نتصرف ازاي فالمصيبة دي.
والدتها: انتي تبتدي شغل مع سنية الخياطة
وانسي الكلية و الهبل ده
دي لوحدها محتاجة مصاريف ياما
وأصلاً عمر أخوكي ما هيرضي تسافري لوحدك .
حسنة:أخويا ده اللي هنطرد فالشارع بسببه
وبعدين هي ال 200 جنيه اللي هتدهوملي ست سنية هيعملوا ايه
انتي لسه قايلة 2000 جنيه كل شهر.
مفيش حل غير اني اسافر القاهرة اقعد عند شادية ادرس و اشتغل
انتي نفسك بتقولي علي شادية بنت جدعة قدرت تشتغل في شركة محترمة و تساعد اهلها
ليه مبقاش زي شادية و ادرس كمان .
والدتها:شادية بت جدعة فعلا مقلقش عليكي معاها، بس برده أخوكي ...
حسنة:أما يرجع رجب بقي هيبقي المفروض هو اللي يفهمنا ليه ورطنا الورطة دي.
أنا هروح بكرة اتصل بشادية اعرفها اني هسافرلها.
مشهد داخلي – ليل-شقة شادية- حجرة المعيشة:
حجرة صغيرة بها (طقم انتريه) كنبة مسندها جهة الحائط و كرسيان من الجهتين خلف احدهم زجاج بلكونة و في المنتصف ترابيزة صغيرة ، و يوجد بوفيه صغير فوقه تلفاز في الجهة المقابلة للكنبة.
في الجهة الاخري علي يمين باب الشقة توجد ترابيزة سفرة صغيرة و اربع كراسي أمامهم تلاجة علي يمين ممر مؤدي للمطبخ والحمام و من الجهة الأخري ممر مؤدي لغرفتي النوم .
توجد ثلاث فتيات بالغرفة.
تجلس واحدة عند السفرة و تضع طلاء أظافر (سوسو)، و تجلس أخري علي أحد الكنبة و تقرا مجلة (نهي) و تظهر الأخيرة بالبلكونة تراقب الشارع(سنية).
تدخل شادية و حسنة من الباب وتحمل حسنة حقيبة يدها و أخري للملابس ، فتترك كل الفتيات ما يفعلن و ينظرن اليها.
شادية : اتفضلي يا حسنة .
تدخل سنية من البلكونة
سنية:عملتي اللي في دماغك برده يا شادية و جبتلنا واحدة زيادة احنا ناقصين.
شادية:اتلمي يا بت هو انتي عارفة تسددي اللي عليكي أما تزعلي ان حد هيقسم معانا.
ادخلي يا حسنة ولا يهمك.
يظهر علي حسنة القلق و تحاول ان تبتسم للفتيات و تومئ برأسها مرحبة.
سوسو:تنوري يا حسنة انتي هتبقي معايا انا وشادية في اوضتنا ،متخافيش خالص كله هيبقي تمام و هتتبسطي معانا هنا.
انتي هتشتغلي معانا في كازينو الجنة.
حسنة: كازينو الجنة.
تحاول شادية ان تشير لسوسو بيدها لتصمت دون لفت نظر حسنة.
وتاخذ حسنة من يدها و تجلسا الي الكنبة بعد تنحي الفتاة الجالسة الي الكرسي المجاور
تضع شادية يدها علي يد حسنة و تميل الي الامام و تنظر اليها.
شادية:انتي لسه جديدة في القاهرة يا حسنة
تتنهد شادية ثم تكمل:الحياة هنا مش سهلة زي ما انتي فاكرة
ترجع شادية بظهرها لتستند و هي تكمل:
عشان اجيب فلوس لاهلي كل شهر بتبهدل أوي.
ومافيش شغل فاشتغلت فالكازينو
اعمل ايه يعني
هما عامة ناس محترمة و مبيتاخروش فالدفع
لو تحبي تشتغلي معانا اكلمهملك.
حسنة: أشتغل ايه يعني؟
سنية: يعني هتشتغلي ايه يعني رقاصة زي ما شادية بتشتغل رقاصة.
تضع حسنة يدها علي وجهها في صدمة.
شادية تنظر لسنية بغضب و تشير اليها بتوعد
شادية:مش رقاصة اوي يعني انا بس بعمل استعراض
يعني تقدري تقولي عليا كده فنانة
وكمان مش عاجبك انزلي دوري علي شغل ولو لقيتي حاجة يبقي الف مبروك.
تربت شادية بقوة علي كتف حسنة وهي تقول.
شادية:أهم حاجة يا حببتي متقوليش لحد فالبلد حاجة
كده كده هيطلعوكي غلطانة عشان صاحبتك رقاصة وتضحك
حسنة: مش قولتي فنانة؟؟
شادية :ومين هناك يفهم.
تقف حسنة
حسنة:أنا هنام دلوقتي وأنزل بكرة الصبح أدور علي شغل.
مشهد داخلي/ليل/شقة شادية/حجرة المعيشة:)
تدخل حسنة من الباب و تجلس علي احد كراسي السفرة وتضع راسها علي الترابيزة.
تخرج نهي من احدي الغرف و تجلس علي الكرسي المقابل لحسنة و تربت علي يدها.
نهي :مالك يا حسنة ايه اللي حصل.
ترفع حسنة رأسها
حسنة: مش لاقية شغل فعلاً هعمل ايه،
اما كلمت امي النهاردة قلتلها كل حاجة زي الفل وكل حاجة زفت.
بقالي اسبوع بدور و مفيش حاجة.
نهي:ماتيجي تشتغلي معايا.
حسنة:بتشتغلي فين؟
نهي:انا بشتغل في محل لبس يعني تنضيف و بساعد الزباين وباخد 500 جنيه في الشهر.
حسنة: شكراً ، بس للاسف مش هينفع
انا محتاجة 2000 جنيه فالشهر غير مصاريفي .
تخرج شادية من الغرفة و بيدها سيجارة و تجلس بجوار حسنة.
شادية:ها بقي
(هتيجي تشتغلي معايا؟
"المدرب حذف المشهد السابق و اضاف الحوار التالي للمشهد الذي سبقه
شادية:
أتخن شغلانة هتلاقيها ب 500 جنيه في الشهر .. و انتي زي ما
بتقولي عايزة 2000 جنيه دفعة واحدة ده غير مصاريفك انتي
.. أنا عارفة بقولك ايه .. بس جربي يمكن حظك يطلع أحسن من حظنا"
"وانا اصلاً الخمس مشاهد اللي حذفتها كانوا بردوا في نفس الجزء ممكن ابقي انشرهم بعدين"
مشهد داخلي/ليل/كازينو الجنة/الصالة:
مكان مظلم بعض الشيء الا الاباجورات الصغيرة فوق كل ترابيزة وبعض الشمعدانات المعلقة في الاركان .
بجوار المسرح يوجد مدخل لغرف تغيير الملابس والي جواره هاتف موضوع علي رف خشبي الي جواره البار.
علي كل ترابيزة يجلس شخصين علي الاقل و الجرسونات يقومون بتقديم البيرة و المشروبات الكحولية باستمرار .
في المنتصف يظهر مسرح تزداد اضائته بعض الشئ و توجد فوقه فرقة موسيقية.
يدخل المسرح 8 فتيات ترتدين فساتين ذهبية طويلة بها فتحتان من اسفل من كل جانب و تظهر كتف واحد
تقف بالمنتصف شادية ترتدي فستان ذهبي به زخارف و تطريزات قصير تنسدل منه خيوط وكاشف للصدر.
حسنة هي اخر فتاة تدخل من ال 8 فتيات يبدو عليها الخجل الشديد والارتباك وترتدي باروكة حمراء كبيرة بعض الخصلات تغطي جزء من وجهها لكنها لا تخفي الشامة .
تبدأ الموسيقي تبدا جميع الفتيات بالرقص الا حسنة .
أحد الزبائن صارخا: مش هترقصي يبقي تغني .
يضحك الباقي و يرددون غني غني
تتوقف الموسيقي
تدفع أحد الفتيات حسنة الي المنتصف، فتبدأ لا ارادياً بالغناء
يصمت الجميع و ترتسم ابتسامات علي وجوههم
يبدوا الغيظ الشديد علي شادية.
مشهد داخلي/نهار/شقة شادية/غرفة المعيشة:
نهي:حتي انتي رضيتي تبقي رقاصة يا حسنة.
حسنة: لا
أنا بغني بس
بقي ليا فقرة لوحدي الناس كلها حبت صوتي
مكنتش عارفة اني بعرف اغني اصلا
شادية:عشان بيبقوا شاربين طينة و محدش سامع حاجة.
حسنة:مش مشكلة المهم اني مبرقصش و هجيب الفلوس اللي انا محتاجاها.
و تسير مبتعدة.
ترتسم ابتسامة علي وجه نهي وتنظر الي شادية التي يبدو عليها الغيظ الشديد.
مشهد داخلي/ليل /كازينو الجنة/حجرة تغيير الملابس:
توجد طاولة طويلة فوقها عدة مرايات مربعة محاطة كل واحدة بلمبات بيضاء .
تجلس اكثر من فتاة بشكل متفرق ليتجهزوا.
تجلس حسنة بالطرف يستند ظهرها الي الحائط و تنظر الي مذكرة بيدها و باليد الاخري قلم.
شادية :أمك عالتليفون روحي كلميها .
حسنة : تليفون ايه؟
شادية:تليفون الكازينو يعني هيكون تليفون ايه؟
يلا اوام
حسنة:وهي ايه اللي يعرفها رقم الكازينو.
شادية:اتصلت مرة عالبيت وانتي مش موجودة فاديتهولها.
حسنة:ازاي تعملي كده
شادية:بس يا بت انتي اجري الحقي كلميها قبل ما حد مالزباين يرد عليها.
تجري حسنة ناحية الباب
شادية:متقلقيش قلتلها ان ده تليفون شركتنا المحترمة
و تضحك.
مشهد داخلي/ليل/كازينو الجنة/الصالة:
تظهر حسنة من ظهرها مرتدية بروكتها ممسكة سماعة الهاتف .
يجلس علي ترابيزة مجاورة رشاد باشا الذي يراقب حسنة ،وهو رجل اقرع ممتلئ الجسد يرتدي بدلة كاملة و يضع دبوس ذهبي ضخم بالكرافتة ويرتدي ساعة ذهبية كبيرة ولديه شارب ضخم يبرم اطرافه كل حين.
صوت عبرالهاتف والدة حسنة:ايه الدوشة دي يا بنتي.
حسنة:ده الشغل بيحبوا يشغلوا اغاني عشان يقدروا يشتغلوا.
صوت عبرالهاتف والدة حسنة:ايه اللي مقعدك فالشغل لدلوقتي الصوت عالي قوي بسمعك بصعوبة.
حسنة:هكلمك بكرة احسن ، متتصليش هنا تاني المدير
بينده عليا
مع السلامة
وتضع السماعة
وهي ذاهبة الي الداخل مرة اخري يمسكها رشاد باشا من ذرعها و يحاول سحبها نحوه.
رشاد باشا:حسنة الجميلة ،متقعدي معايا شوية.
تسحب حسنه ذراعها بقوة وتجري الي داخل
و تصطدم بذراع شادية القادمة الي الصالة و تكمل طريقها بلا توقف.
شادية:أؤمرني يا باشا؟
رشاد باشا: عايز حسنة.
شادية:شوف انت عايز ايه من حسنة وانا اعملهولك .
يحرك رأسه بالرفض و يتوجه الي ترابيزته .
رشاد باشا: لو حسنة مجتش حالا انا همشي ومش هاجي الكازينو ده تاني.
مشهد داخلي/ليل/كازينو الجنة/حجرة تغيير الملابس:
تتوجه شادية ناحية حسنة وهي غاضبة.
شادية:كده تجري مالراجل
ده اهم زبون عندنا
حسنة:اعمله ايه يعني
شادية:ايه اعمله ايه يعني
اقعدي معاه
اشربي حاجة
اتدلعي شوية
زينا كلنا
حسنة:لا انا مش هعمل كده
لو همك قوي اطلعي اقعدي معاه انتي
شادية:حاولت قال عايز حسنة عايز حسنة
كانك عملاله عمل
وكمان يابت انتي اولي بالسبوبة دي
ممكن تخلصي من دينك اللي عند المعلم متولي
انا عرفاه كويس ده شراني
حسنة:لا شكرا
الله الغني
ثم تشهق حسنة وتبدأ في خلع بروكتها مبتسمة
حسنة:علي فكرة انا اقدر اخليكي شبهي تمام.
مشهد خارجي/نهار/بلدة حسنة/جسر فوق الترعة:
جسر اسمنتي بسيط ، كان يمر بجواره معلم متولي و هو رجل ضخم يرتدي جلباب ويمسك بعصا سير مزخرفة و خلفه يسير رجلان من حاشيته .
يتوقف حينما يلمح احدهم قادم من الجهة الاخري من الجسر فيشير الي حاشيته بالابتعاد قليلا و يتوقف لينتظره.
رجب قادم مرتدي ملابسه العسكرية ويرتدي الحقيبة الخاصة به و هو شاب اسمر طويل .
معلم متولي:حمدالله عالسلامة يا رجب
رجب:الله يسلمك يا معلم
سامحني اتأخرت عليك فالدفع
هرجع اشتغل و
معلم متولي:شادية لقت شغل لاختك و بتسدد كل شهر.
ينظر اليه رجب مذهولا ، ثم يجري مبتعداً.
معلم متولي يضحك:ماله المجنون ده .
مشهد داخلي/نهار/منزل حسنة:
يدفع رجب الباب بقوة ، ويدخل لينظر في جميع الاتجاهات
تاتي امه من الخارج فتراه و تفتح ذراعيها لاحتضانه
والدة حسنة:رجب انت رجعت
يدفع رجب يدها
رجب:فين حسنة؟
فين حسنة؟
والدة حسنة:ايه يابني مالك؟
حسنة في مصر بتشتغل عشان تسدد دينك.
رجب:بتشتغل ايه بسلامتها .
والدة حسنة : بتشتغل مع شادية.
يلوح رجب يده فالهواء و هو يصرخ
رجب:شادية
سايبة بنتك تشتغل مع شادية
اختي انا بتشتغل مع شادية
والدة حسنة:ايه بتصرخ كده ليه
كانت تعمل ايه يعني؟
يمسك ذراعيها بقوة
رجب:سبتي بنتك تشتغل رقاصة.
والدة حسنة :رقاصة ايه يا بني دي موظفة في شركة محترمة.
رجب:لا يا اما شادية رقاصة و بتقعد مع الزباين كمان.
تلطم الام وجهها
يجري رجب نحو الغرفة مسرعاً ثم يعود و معه مسدس.
تحاول امه ان تسحبه من ذراعه و هي تبكي.
والدة حسنة:هتعمل ايه يابني استنا اما نتاكد استني بس.
ينظر اليها رجب بغضب ثم يدفعها ويرحل.
مشهد داخلي/نهار/قطار يتحرك:
يجلس رجب بداخل القطار المزدحم و يتذكر.
مشهد داخلي /ليل/كازينو الجنة/الصالة:
تدخل شادية ورجب من الباب و يتجهان ناحية ترابيزة بالطرف يظهر عليها المعلم متولي .
شادية:الراجل اللي هعرفك عليه دلوقتي عندنا مالبلد بس ايه هينقلك نقلة تانية.
رجب :ياريت انا زهقت مالفقر.
شادية:ازيك يا معلم متولي ده رجب اللي حكتلك عنه.
معلم متولي:ازيك يا رجب سمعت عنك كتير، ياتري هتعرف تبيع زي مابتعرف تشرب.
رجب:متقلقش يا معلم انا هعجبك قوي.
معلم متولي:انا كنت قلقان لان اللي بيحب حاجة زي دي صعب يقدر يبيعها بس شادية طمنتني.
عامةً امضيلي عالوصل ده ضمان لحقي انت هتاخد بضاعة بالفات لازم اضمن حقي برده.
مشهد داخلي/نهار/قطار يتحرك:
يجلس رجب بداخل القطار المزدحم و ينظر من النافذة و يتذكر.
مشهد داخلي /ليل/كازينو الجنة/الصالة:
يدخل رجب الصالة فيجد شادية جالسة علي ترابيزة بأحد الأركان وهناك رجل يداعبها وهي مستسلمة و تنظر الي الصالة .
تري رجب فتزيح عنها الرجل.
شادية:معلش ياباشا دقيقة و هرجعلك تاني .
تذهب في اتجاه رجب مسرعة فيمسكها من ذراع واحدة و يدفعها امامه حتي مدخل حجرة خلع الملابس
يدفعها نحو الحائط فتقوم بدفعه
شادية:ايه
رجب:ايه اللي بتعمليه ده
شادية:امال انت فاكرني بشتغل هنا ايه
رجب:كنت فاكرك بترقصي بس.
شادية:لا يا خويا لازم كمان لما زبون يطلب اقعد معاه اقعد معاه
امال هصرف علي اهلي و علي بتبلبعوا ازاي.
رجب:اكيد في طريقة تانية
انا دلوقتي في مصيبة لازم الاقي حل
البضاعة اللي خدتها من معلم متولي اتسرقت مش عارف اعمل ايه.
شادية:اتسرقت برضه
رجب:اعمل ايه دلوقتي مع معلم متولي الايصال اللي معاه ده هيخليه يطردنا مالبيت
وزي ما انتي عارفة جالي استدعي
شادية:متقلقش هكلمهولك ياجلك السداد
عشان تعرف ان ملكش غيري.
مشهد داخلي/ليل/القطار يقف داخل المحطة:
يقف رجب ويحمل حقيبته استعدادا للنزول.
مشهد داخلي /ليل/كازينو الجنة/الصالة:
المكان مزدحم وترقص بعض الراقصات علي المسرح ،أصوات مرتفعة ضحك و كلام و موسيقي.
يجلس البعض عند الطاولات والبعض يقف و يرقص عند طاولته.
يمر بعض الجارسونات حاملين البيرة و كؤوس المشروبات.
جرس الهاتف يرن
يدخل رجب من الباب ،تختفي جميع الاصوات الا صوت الهاتف.
في نفس الاثناء تتحرك حسنة لتخرج من حجرة تغيير الملابس غير مرتدية بروكتها.
يمر رجب بنظره علي المكان بعيون جاحظة وهو غاضب ويضع يده اليمني في جيبه و الاخري تظهر بشكل قبضة.
تصل حسنة الي الهاتف و تمسك به.
صوت عبر الهاتف والدة حسنة:ايه يا بنتي بتصل من الصبح في كل حته
تستدير حسنة باتجاه الصالة فتلمح رجب الذي كان ينظرفي اتجاهها لكن في نفس الاثناء مر احد الجارسونات من امامها فلم يرها رجب
صوت عبر الهاتف والدة حسنة:اهربي يا حسنة اخوكي جاي يقتلك.
يقع نظر رجب علي الطاولة التي تجلس بها شادية وهي نفس الترابيزة التي كانت تجلس بها عندما رأها مع احد الرجال وهي ايضا في نفس الوضع هذه المرة الرجل هو رشاد باشا و ترتدي شادية الباروكة الكبيرة
يقع نظر رجب علي الشامة فيزيد من الضغط علي قبضته ويخرج مسدسه و يتحرك في اتجاه شادية.
تري حسنة المسدس فيقع الهاتف من يدها و تبدا في الحركة ناحية رجب .
تدفع الجارسون أمامها تسقط من يده الصينية و يحدث صوت ارتطام قوي .
رجب لا يلتفت و يرفع مسدسه باتجاه راس شادية .
يطلق رصاصة
حسنة صارخة:رجب لاااااا.
ينظر رجب الي حسنة
ثم ينظر الي شادية التي سقطت بروكتها فيري عينيها بوضوح وهي تنظر اليه
يسقط المسدس من يده
تجلس حسنة علي ركبتيها باكية .
يتحرك العديد من الشخاص باتجاه شادية و يمسك البعض برجب
رجب يتم سحبه للخارج ينظر الي اخته التي تبكي و الي شادية المقتولة
فيضحك بشكل هستيري ثم تسيل الدموع من عينيه.
النهاية
Comments
Post a Comment