سيناريو أفراح 1
بعد ورشة السيناريو كنا اتقابلنا تاني بعض من المجموعة و المدرب
و المدرب قالنا ان في شركة عايزة مجموعة كتاب جداد يكتبوا مسلسلات مع بعض علي شكل مجموعة
و هيكون في مقابل مادي
ماخدتش الكلام في بالي لانه مش واضح بعد كده كان بعتلنا عالجروب و قال نفس الكلام و ابتدا يتصل بشخص شخص
و أي حد من زمايلنا بعد ما يكلمه كان بيتصل او يبعتوا يسالوني انتي معانا اكيد فالموضوع ده صح
او بيسالوه اية معانا اكيد ، لان علي حسب ما قال اني كتبت احسن سينايو وقت الورشة
و واحدة من زميلتنا كانت شايفة ان المفروض نبتدي نتقابل و نكتب سوا و انا مكنتش فاهمة حاجة
لان مجتليش معلومة واضحة مالمصدر
بعد فترة المدرب اتصل بيا و قالي انا كده كده قلتلكوا اما اتقابلنا و بردوا مقالش معلومات زيادة
المهم سألته المفروض نكتب حاجة و نبعتهالك ولا ايه قال : اه اه اكتبي حاجة و كذا حد هيشوف و يقول رأيه
قلتله :طب هتبدءوا انت قلت بعد رمضان انا مسافرة بعد رمضان لمدة شهر و نص ، المفروض الغي السفر ولا عادي هبدأ اما ارجع
رد:عادي مش مشكلة اما تيجي هتبتدي معانا عادي و مش محتاجة تكوني موجودة عشان تبقي معانا انتي كده كده معانا
قلت: تمام انا هكتب سيناريو و ابعتهولك و في اللي بعته قبل كده
رد:تمام
مش فاكرة الكلام ده حصل علي مرة ولا اتنين بس ده المختصر اللي فكراه
المهم اني قبل كده ناقشته عن فكرة السيناريو اللي معانا النهاردة
اني زمان شفت بنت بتشتغل نفس الوظيفة دي في فرح حضرته
و ده تخيلي عن حياتها ، كان سهل ابتدي السيناريو بس مكانش سهل انهيه كنت واقفه فالنص مش عارفة اكمل ازاي و ده بيحصل كتير
بعد كده كنت منتظرة رأي المدرب في السيناريو بس مقالش قال مش فاضي يقرأه
و السيناريو اللي قبله كوكب تاني نفس الكلام برغم اني اما بعته ليه قالي ابعتيه format او صيغة تانيه عشان اعرف اقرأه
فبعته يجي تلات مرات
بردوا مجاليش اي رد او رأي عن الحاجات دي
بعت اسئله قول حلو او وحش مردش
بعد اما رجهت مالسفر كان بيسألني انتي اشتغلتي تاني ولا لا؟ مع انه عارف اني سبت شغلي قبل اما اسافر و اصلا عامله حسابي اني ارجع اشتغل معاه
سألته ليه مقرأتش السيناريو وقت الورشة كنت بتقرأ سيناريوهاتنا احنا العشرة في ساعتين و انت جاي فالطريق
قالي انا حاسس بصيغة اتهام
مفهمتش ايه الاتهام فاللي قلته
اللي عرفته بعد كده ان هما ابتدوا شغل بعد رمضان علي طول اول ما سافرت تقريبا هو و اتنين زمايلنا
و زميلتنا رغم انها كانت متحمسة جدا للموضوع كان الرد عليها غير واضح زيي كده
و متقالتش حتي انتوا اترفضتوا و شغلكوا وحش حتي
اللي هو حاجة غريبة جداً
وبعد كده الشركة اللي كانوا شغالين معاها اصلاً لغوا الموضوع
بس دي حاجة دايقتني لان الاتنين زمايلنا اللي اخدهم معاه كانوا شاطرين و شغلهم حلو و بجد يستاهلوا كل خير
المهم بعد فترة نفس المدرب قالي ابعتله السيناريوهات مردتش عليه لاني اصلا بعتاها 3 مرات قبل كده
اما حبيت ابعتها لناس زمايلنا عملت بحث علي اسمه فالايمل و عملت اعادة ارسال للايميل
ما علينا الله أعلم بالنوايا و الظروف من الجهة التانية كان شكلها ايه
انا بس بحب دايما الردود الواضحة و ده اللي طلبته قبلها
شايفة ان اي حد مقدم علي وظيفة او دراسة او سفر او حتي ارتباط او علاقة صداقة الاحسن يعرف مكانه و موقفه و هو فين
حتي لو رفض احسن من انه يفضل مستني رد مش هيستقبله
كان رأي زمايلنا ان انا كتبت تفاصيل كتير زيادة عن اللازم
استنوا السيناريو نفسه بكره
Comments
Post a Comment