اخر الاسبوع
اخر الاسبوع او الويك اند
حاجة مهمة جداً بالنسبة لي
دايماً بحب احاول اخرج او اقضيهم باحسن طريقة ممكنة عشان اقدر استحمل الاسبوع اللي بعدها
و ممكن عشان انسي الاسبوع اللي فات
احاول اضيع التعب و التوتر اللي عدوا عليا
بس ساعات بيعدوا من غير اي لازمة باسباب زي :
-الفلوس 💰 :مع ان في خروجات بسيطة زي اي تمشية زي ان نركب مواصلات في اكتر من حاجة ممكن متكلفش
بس الواحد بقي بيحس اما بيخرج الفلوس بتطير لوحدها، فاما الدنيا تبقي مازمة بنفضل نقعد فالبيت بكرامتنا
-الصحبة: هو الواحد ممكن يخرج لوحده ويتبسط عملتها كذا مرة بس ساعات اما بيتعود يخرج مع ناس بيلزم نفسه من غير ما يقصد بانه يخرج معاهم
و يستني بقي ظروفهم هما كمان مزاجهم و مزاجكم ايه ووجع راس كده
حد عايز يروح هنا حد هنا حد بطئ حد لكع حد يشل حد مفلس حد بيحب يتسنجأ حد فصيل حد مصر علي مكان معين كل مرة حد عايزنا نتجمع في بيته بس كل مرة
زهق
-التعب: العيا وارد عادي ان تعب الاسبوع يجي علي صحتنا منقدرش نتحمل نخرج مالبيت
او نعيا عادي دور برد زي الفل اي حاجة كده
-الكسل:بطل القصة دايما سبب اي فشل و اي حاجة مبتكملش غالبا بيبقي هو الكسل
يعني كل اللي فات ده ليه حل الا الكسل اما بيحل عالواحد مفيش حل ابداً
المهم النهاردة و بقالي كام يوم بفكر ان في كذا ويك اند ضيعتهم بسبب الناس اللي اعرفهم هنا
اتزنق في مشاوير معاهم الغي رحلة لحد ما يبقي معاهم فلوس ييجوا معايا
نروح خروجات زيارات لناس اصحابنا في بيوتها (و دي مبعتبرهاش خروجات اصلاً)
غير اني طالما مسافرة ببقي عايزة اشوف اماكن جديدة انا معرفش ممكن في حياتي هتجيلي فرصة تانية ازور الاماكن دي ولا لا
المهم النهاردة روحت مع واحدة مشوار عشان شغلها وانا فالمشوار الشغل قاعدين يبعتولي حاجات اخلصها وابعتها في ساعتها (و دي حاجة تعصب خاصةً انه مش شغلي و بعمله من باب الذوق) و بعدين لقيت البنت بتقولي نروح مشوار تاني عشانها و بعيد
اتعصبت طبعاً قلتلها روحي انتي انا هروح اي حتة
انا راجعة قريب و بضيع الويك اند مبروحش حتة
المهم في الاخر روحنا بارك جميلة كان فيها طاوويس و طيور تانية و دي حاجة جميلة جداً
عقبال بكرة بقي
Comments
Post a Comment