نبتدي منين الحكاية .... ورشة السيناريو

انا فعلاً بيبقي صعب عليا ابتدي الحكايات

و اما ببتديها ممبقاش عارفة انهيها منين 

و بتوه واحكي حكايات تانية و ادخل في مواضيع كتير مالهاش اول مالاخر 

و ساعات بنسي الموضوع اللي انا بحكيه اصلاً

و في نص الكلام بقول المهم زي ما هعمل دلوقتي و احاول ارجع للموضوع 

المهم كنت بقول ايه

كنت بحكي ايه 

ورشة السيناريو

و عشان ابدأ احكي ممكن ادخل في تلات مواضيع تانية أو اكتر اصلاً

بس هحاول مخرجش مالموضوع

انا كنت بشتغل في شركة في المكتب الاداري بتاعها و هحكي عنها بعدين 

بس طبيعة شغلي و طبيعة المكان كانت مملة جداً
في المرحلة دي انا حسيت اني بفقد كل حاجة اتعلمتها قبل كده

او صفات كويسة اكتسبتها و طموحي و احلامي و رغبتي فالحياة

بس من كتر الملل كنت طول ما انا قاعدة كنت بخلي النميمة العادية او الدردشة حكايات و قصص و سيناريوهات كاملة

كان يعدي شخص ادامي ابتدي اتخيل ممكن حياته تكون عاملة ازاي و مواقف و سيناريوهات كاملة 

نقرا خبر عن احد الفنانين يبقي ده نفس الكلام

كنت ببتدي الحكايات دي عادةً باني أقول "انا هقولكوا الي حصل فعلاً" ساعتها اللي موجودين يعرفوا اني هبتدي أألف 

ولاني كنت فاقدة اي طموح عملي وقتها فعلي عكس عادتي من ساعة ما اتخرجت مكنتش باخد اي كورسات

و عادةً انا كنت بشتغل في اماكن فيها عدد اكبر من الناس و بخرج معاهم و كده وده للاسف مكانش الوضع

فشوفت مكان قريب واحدة كانت قيلالي عليه من كتير قوي كنت متابعة صافحته عندهم انشطة مختلفة و بيعرض افلام من بلاد مختلفة كنت ببقي نفسي احضر بس بكسل او زمان بنشغل و كمان قيود الوقت وقتها في بيتنا كانت عاليه فكان صعب احضر الفيلم عشان متاخرش

اللي حصل اني روحت في مرة الحمدلله و ابتديت اواظب و احضر كل مرة 

كانوا بيعرضوا فيلم و بعده مناقشة عنه و كنت مبسوطة جدا مالموضوع ده  و اتعرفت علي ناس جديدة و ده شئ كنت محتاجاه فالفترة دي

و بعدها كانوا كاتبين ان في ورشة سيناريو ، فالاول مفكرتش اروح 

و بعدين قلت لبابا في مرة اني بعد الشغل غالبا هروح ورشة سيناريو

محجزتش قبلها لان كان المفروض املا بينات من ضمنها اكتب ليه عايزة اشترك و ايه اكتر مشهد عجبني

و كان وقتها صعب اعبر عن اللي جوايا بالكتابة اكتر من دلوقتي حتي كان صعب عليا اكتب تعليق عالفيسبوك

فروحت فجأة بعد الشغل و قلتلهم في ورشة سيناريو بفكر اشترك

قالولي ادخلي بسرعة دي شغالة 

دخلت و حضرت معاهم و في فترة الاستراحة روحت و اصريت اني ادفع احسن بابا يكلمني يقول لا مشتركش او محضرش ساعتها 

اقوله انا خلاص دفعت الرسوم مش هينفع الغي الاشتراك ، كان من رأي المسئول في المكان ان يستحسن ادفع بعد ما اكمل عالاقل اول محاضرة حتي هقدر أحدد هو ده اللي انا عيزاه ولا لا

بس انا اصريت و كملت

و بشكل كبير انا اتبسطت من الورشة و حبيتها و اكتشفت اني في ناس شايفة اني ممكن اقدر اكتب

المحاضرة الاولي كانت كلام تعريفي و كنا اوقات بنسقط مع ان الاسلوب كان كويس لحد ما يشغل فيديو من فيلم يوضح لنا بيه

 بس بشكل عام كانت جميلة و الواحد علي الاقل اكتشف انه ممكن يكتب و ممكن ناس تقول علي ده كويس

و الواحد كسر الحاجز اللي كان بينه و بين التعبير بالكتابة 

الورشة كانت عبارة عن تعريف بالسيناريو و الحوار و ازاي بيتكون والشخصيات و..... حاجات كتير كده
المهم في المحاضرة الرابعة كان المفروض نوصل لمشهد معين في مشاهدة فيلم the fundmental of caring و بعدها نكتب مشهد ننهي بيه الفيلم هو اللي فهمته وقتها ان المفروض نكتب مشهد واحد في ناس كتبوا اكتر من مشهد ما علينا المهم ال post الجاية هحط المشهد اللي كتبته
و بعد كده اتقسمنا مجموعات عشان نكتب فيلم سوي للاسف كنت رئيسة المجموعة و الحمدلله المجموعة كانوا منفضنلي كان في شوية افكار بعد كده اما عرضناها علي المدرب اختار فكرتي بعد كده حاولنا نشتغل عليها سوا و بعد كده المدرب خلانا ناخد السيناريو في اتجاه مختلف ، ففي اخر محاضرة كتبتها بناء علي روئيته كان طلب مننا نكتب سيناريو بس اما طلب ده كان عاليوم اللي قبلها علي طول فكتبتها و بعتها المهم البوست اللي بعد الجاية هنشرها
و اتمني ان يوم مالايام اكتبها علي حسب رؤيتي ليها مع اني مش فكراها قوي هو الاختلاف كان في شوية مشاهد
و بعد كده كان المدرب خلي كل واحد فينا يكتب سيناريو لوحده بنائا علي قصة من سطر او سطرين مديهاله
فكتبتها و قال انها احلي سيناريو في الورشة وانا كنت مذهولة الصراحة بس زمايلي كمان قالوا انه كويس
هنشر الحاجات اللي قلت عليها و بعد كده هحكي قصة السيناريوهين التانيين و هنشرهم و بعدها هشوف لو هحول الافكار الكتير اللي عندي لسيناريو و انشرها
ربنا يدينا و يديكم طولة العمر.