العودة للسيناريو

كنت بحكي لواحدة صاحبتي عن الاشكال الغريبة اللي قبلتها وانا مسافرة وازاي بيحوروا 

وازاي انا اتفاجات و اتصدمت

وازاي في ناس كانت بتقول عن ناس ازاي بيتصرفوا كده و بعدها اتصرفوا بنفس الطريقة بالظبط

نفس طريقة التحوير نفس الكدب نفس القرف

المهم صاحبتي قالتلي اكتبيها قصة 

قلتلها تصدقي فعلا المفروض اكتبها قصة  انا كنت بكتب قبل كده المفروض ارجع اكتب

وبعدها افتكرت اني عملت المدونة دي اصلا عشان ارجع اكتب 

بس قعدت اكتب شوية رغي ممكن مش مسلي اصلا

بالرغم من اني المفروض بعرف اكتب سيناريو نسبيا يعني

المهم امبارح كنت خارجة مع ناس منهم واحدة مقابلتهاش من فترة هي كانت في المنظمة اللي سافرت تبعها المرتين اللي فاتوا دول

هي اول حد اتعاملت معاه من هناك و كانت جدعة و بتهتم فعلا 

و بتساعد مش بس مشتركة عشان تضيفها للسيرة الذاتية بتاعتها بعد كده زي ما كلهم بيعملوا و ينفضوا للناس اللي المفروض انهم مسؤولين يساعدوهم 

المهم قعدت احكيلها و كانت فعلا عاجبها الحكايات والقصص اللي بقولهالها

و قالتلي انها اتبسطت بالقصص وان اسلوبي فالحكاية عاجبها 

برغم ان القصص كانت كئيبة بردو 😁

بس هي بنت ناس وطيبة 

المهم الموقفين دول فكروني اني مكتبتش سيناريو ولا افكار بنية اني احولها لسيناريو من فترة 

من سنة و نص تقريبا حضرت ورشة سيناريو

و علي حسب اللي اتقالي وقتها اني موهوبة فالموضوع ده و بعرف اكتب حلو

بعيداً عن ايه اللي حصل بعد كده احكيه بعدين و ايه اللي حصل فالورشة احكيه بعدين بردوا

بس كنت بكتب من فترة للتانية والمفروض عملت المدونة دي عشان اكتب بشكل منتظم 

بس للاسف مكتبتش سيناريوهات ولا حتي قصص تخليكوا تتخيلوا المشهد بالتفاصيل زي 

ما انا كنت بعمل او زي ما بحكي لاصحابي و ساعات بمثلها و بقلد الاصوات 😁😃

لكني قعدت كلام فلسفي انا مليش فيه ولا عندي ثقافة وعلم كافي اني اكتبه بطريقة كويسة 

يعني كنت بفضفض 

هحاول الفترة الجاية انشر السيناريوهات اللي كتبتها 

و اكتب بعد كده قصص او مشاهد 

اتمني ده يكون افضل 

و اظن انا نفسي هستمتع اكتر وانا بكتبه